hiking100fun

[Fun Hiking 十一月號 – 第二炮] 11月23日 東平洲環島遊

各位行山隊友及有興趣參加既朋友: 來緊11月23日既行山團, 我地會去東平洲環島遊

由於小弟想帶給大家有一個比較有彈性既行程, 小弟現正考慮租船從馬料水碼頭往返東平洲, 及有可能在船上為大家安排自助午餐既關係, 小弟十分之需要在短時間內知到實際參加東平洲環島遊的總人數, 所以之前有參加過行山團既隊友, 及之前有報過名行山但又去唔到既朋友, 請於儘快或於今個星期四的下午5點正前, 在 [Confirmation List] 下面的人名名單內, 或經 PM / email, 確認是否參加.

至於之前未報過名參加行山團既朋友, 我地亦一樣歡迎你在 [新加入名單] 下面報名參加, 但請你地在報名時, 一定要確認可以參加, 同埋一定要 PM 你既名, 手提電話號碼, 及電郵地址給小弟, 如只在[新加入名單]內加上你個名而又唔 PM 你既資料比小弟, 你既報名一律不會受理, 多謝合作!

行山路線: 平洲環島郊遊徑
行山日期： 11月23日 (即下個星期日)
集合時間: 暫定為上午8點半
集合地點 : 暫定為馬料水碼頭
起點: 東平洲碼頭
終點: 東平洲碼頭
來回船程: 約3小時
行山時間: 約3小時
地道美食：坪洲士多

預計全天所需時間: 由上午8點半至晚上6點45分

由馬料水碼頭往返東平洲碼頭, 如不租船, 所需費用: $80/人
如租船由馬料水碼頭往返東平洲碼頭 + 自助午餐, 所需費用: TBA
前往馬料水碼頭方法:
1. 可由大學火車站步行至馬料水2號碼頭(約15分鐘)
2. 可於沙田火車站(B出口轉左)，步行斜路往乘綠色專線小巴27號前往馬料水渡輪碼頭(終點站為香港科技園)

行山路線圖:

« ‹ of 2 › »

團長後記：

首先多謝各位尋日參加 Fun Hiking 既東平洲環島遊.

尋 日早上, 我地一行17人分別於8點半左右到達馬料水碼頭集合, 原來假日真係有好多人去東平洲, 我地咁多人, 如果唔提早 d訂飛, 同埋早少少去到碼頭, 真係分分鐘有人冇得上船, 幸好多謝各位合作, 我地成班嘩鬼個個都上到架船, 而船亦準時於9點開出向東平洲出發.

係船上, 我地各人都有講有笑, 完全感覺唔到有任何人有暈船浪既問題, 所以因為怕暈船浪而冇參加今次東平洲環島遊既朋友, 你地走寶了.

小弟真係冇認錯人, 原來小弟係好幾年之前, 巳經同 DonDon 見過面, 大家仲一齊係同一隻船內相處咗十日八日, 尋日見返呢個舊相好, 真係好開心!

經過1.5小時既船程, 我地終於到達東平洲了!

突然記起, 話說尋日係坐船期間, 同紅葉談起中國既語言, 原來古時 d 人好多都係講廣東話, 唔怪得用廣東話讀唐詩比起用普通話讀較流暢, 而我亦趁機問佢個 “囧” 字點讀, 依家我終於知點讀啦! 紅葉兄, 果然係一個文人!

好 了! 當我地到達東平洲後, 由於起點人山人海, 我地擾攘咗一段時間約11點先開始行[平洲環島郊遊徑], 行咗數分鐘, 我地便係一個石灘取景影 Group Photo, 呢次由 askaseed 負責, 嘩! 支鏡好勁呀! 幅相影都個個都好靚仔靚女! 呂良偉同方中信好 Man 呀!

之後, 由富仔, 盲俠, 阿良, DD, Bono 等帶頭行, 我地經過一個廢墟, 其間小弟見到有唔少廢人係處影廢墟, 再過無幾耐, 我地到達天后宮, 係等侯其餘幾位隊友到達前, 當中竟然有人係天后宮門前大講痾屎, 真係有辱天后娘娘呀!

人齊之後, 我地沿岸邊石灘行, 沿途天然石景壯觀, 紅葉問我覺唔覺得好似身處火星, 我自己都有d 呢種感覺, 可惜東平洲屬保護區, 如果唔係尋日我巳經執咗好多石頭及貝殼返屋企.

行到去更樓石, 係石崖邊望出去, 真係好正!

人齊後, 我地就沿小路行, 當時紅葉問我, 遠望海邊又黑又濕既石灘嗰邊係咪難過水, 我當時都有 d 懷疑 , 冇理由難過水真係咁 challenging 呱? 點知當我地向小山向上行時, 才發現海邊又黑又濕既石灘嗰邊真係難過水, 不過算啦! 我地一行成17人, 行難過水唔多唔少都有 d 風險, 因為嗰時成12點幾, 巳開始潮漲. 到行到上小山頂時, 聽到崖下 d 浪打到澎澎聲, 我都慶幸大家冇行難過水.

我地沿住小路係小山崖上行時, 阿妄煮話我地呃佢話唔使點上山, 我冇心呃你架, 因為之前我地都冇人黎過, 睇地圖條路線真係只睇到沿岸行吧!

話時話, 阿 7, 狀態越來越掂, 可以行鳳凰山之日, 不遠巳!

到我地去到斬頸洲後, 紅葉同妄煮就知由捷徑走回坪洲士多, 而小弟, Bono, 阿7, Gundam, 富仔, askaseed, lhk, DD, 阿6, 及其他隊友, 一行15人, 又沿着原本路線行, 臨尾一段係沙灘, 眾人懷看既興奮又肚餓既心情, 行完成個島, 最後到達坪洲士多跟紅葉同妄煮會合, 然行共進一個美味午餐.

完午餐後, 有好幾位隊友中飯毒 咗一陣, 阿6, DD, 妄煮及富仔就鋤大D, 紅葉, Bono, 及阿7同佢d 朋友等, 就係處圍觀, askaseed 同佢個好朋友就去咗影相.

到約下午4點, 士多阿姐同我講話有船早走, 我地17人又剛剛好趕得及上呢一班船, 真係正正! 而於5:45pm, 我地終於返到馬料水碼頭, 眾人依依不捨咁各自歸家!

尋日真係行得好 happy, 風景正, 隊友又搞笑, 多謝各位隊友參加!

[Fun Hiking 十一月號 – 第一炮] 11月9日行山燒烤團

各位行山隊友及有興趣參加既朋友:

來緊11月9日既行山團, 我地行完山後會舉行 BBQ.

行山路線巳確定為: 龍蝦灣郊遊徑

由於要準備食物及燒烤爐數量關係, 今次既行山燒烤團, 名額只有25人, 亦因名額有限, 之前有參加過行山團既隊友, 及之前有報過名行山但又去唔到既朋友, 會有優先參加權, 而新報名的朋友會暫時被排係 waiting list 之內, 請於今個星期五的下午5點正前, 在下面的人名名單內, 或經 PM / email, 確認是否參加.

行山路線: 龍蝦灣郊遊徑
行山日期： 11月9日 (即下個星期日)
集合時間： 暫定為上午九點半
集合地點 : 暫定為大坑墩停車場

前往方法 :
1. 從將軍澳或彩虹搭小巴至清水灣道與大門路的回旋處下車, 再沿清水灣道向東南方向前行約20分鐘到大坑墩停車場
2. 直接駕車至龍蝦灣郊遊徑入口旁的大坑墩停車場

起點: 大坑墩停車場 (附圖位置 4)
終點及燒烤地點: 近龍蝦灣路的燒烤場 (附圖位置 19)

行程時間: 約1小時 (不包括 BBQ所需時間)

路線圖:

備注:
1. 請各行山隊團友儘快確定是否參加, 好讓小弟儘力安排順風車事宜, 但注意順風車坐位不是先到先得, 而是要看駕車的隊友所行的路線而定, 撘不到順風車的隊友, 請不要介意.
2. 如任何隊友會帶太太 / 女朋友 / 小孩 / 二奶 / GL 參加, 請在確認時報上總人數.
3. 新報名的朋友, 請在確認參加後, PM 你的手提電話號碼及 email address 比小弟.
4. 韋信行得到的路線, 個個都會行得到!
5. 若25人名額全滿, 但仲有唔少人想參加, 小弟會儘力安排可否增加名額, 不便之處, 敬請原諒!

龍蝦灣全景

在北潭涌巴士總站下車後，沿北潭路前行，跨過復興橋，即達北潭涌自然教育徑。小徑沿河畔而築，平坦易走，沿途設有二十二個分站，介紹各種咸淡水交界處經常可見的地理環境及生物，至上窰民俗文物館為終點。

教育徑的首站為「涌」，站在復興橋上，可以看見北潭涌的地理環境，並且了解到這個地名的由來。涌是指流出海的水道，而在潮漲時，海水卻又會倒流入河道，形成咸淡水交界的獨特生態環境，北潭湧正是位於受潮汐影響的河口，名字就是由此而來。

走到「泥灘」站，可見到一片片紅樹林，紅樹的氣根很特別，都是一支支狀似筷子的直立著，從泥面伸出來，呼吸空氣，以適應泥灘的環境。另一種在泥灘濕地常見的 植物是露兜樹，其葉長而帶刺，果實狀似菠蘿；葉可用來包裹粽子及織席子，果核則有去暑清熱之效。在泥灘上又可見到蟹鉗一大一小的招潮蟹 等濕地生物。

離開泥灘，沿教育徑穿過林地及竹林，有一些從前村民常加利用的植物。葉面粗糙的錫葉藤，以往被村民用來打磨象牙筷子及錫器；樹 身芳香的牙香樹，則用來制作線香。接近終點站，途經一個灰石，這座石灰窰連同上诖村，均被列作法定古跡，上窰村並已改為上窰民俗文物館，游人可入內參觀。

踏上郊遊徑，初段稍為傾斜，不久可敞見右方起子灣伸延的海岸，對出的是黃宜洲及斬竹灣，風光旖旎。繼續前行，途經多道清溪，景色怡人。不久便經過一個深谷， 谷底下的海灣便是曝罟灣。對出的海島，小的是大頭洲，大的為滘西洲，當中設有高爾夫球場。離開深谷，便到達一處露營地點，可稍作休息。

休息過後，一路走在郊遊徑上，前面忽而出現一片人工化的青草地，還有一個涼亭，這裏就是昔日的越南船民羈留中心──萬宜羈留中心的遺址，該中心於一九九八年關 閉，是本港最後一個關閉的羈留中心。其實，當年在郊野公園內興建羈留中心，曾引起社會爭議，並在郊野公園及海岸公園委員會上激烈討論。

再行至西貢萬宜路，抵達萬宜水庫的西壩，便是上窰郊遊徑的終點。萬宜水庫分別位於糧船灣洲和西貢半島東部海峽的水壩，高於水平線六十四米，是全港容量最大的水 塘，儲水量達六百億加侖（二億八千萬立方米）。在興建水壩之前，需於建築堤壩地點建造圍堰，將海水隔開，抽乾海床範圍內的海水，挖除黏土和沙，才築堤壩， 使水壩能穩固地建造在堅硬的岩石上。堤壩建成後，圍堰仍然保留，用作主壩的護堤，而其中東壩向海的一面更安放了七千多塊每塊各重25噸的防波石，阻擋來自 南中國海及太平洋海浪的衝擊。

注意事項：沿西貢萬宜路步行約四十五分鐘，可返抵北潭涌乘車離開。

集合地點： 北潭涌巴士總站
起點： 北潭涌
終點： 北潭涌
行程： 3 小時
里數： 7 公里
難度： 2 星級
日期： 2008-11-01
時間： 10:00 am
領隊： 韋信
團員：Sarah、Sandy、Thomas
參考圖片： 圖片連結 | 圖片連結
地圖： 地圖連結

由烏蛟騰出發，經九擔租、上苗田、下苗田、三椏涌、三椏村，經犁頭石再回到烏蛟騰。沿途經過多個廢村，飽覽印洲塘景色，並在荔枝窩或三椏村品嚐地道客家走地雞及芋頭扣肉。

集合地點： 烏蛟騰停車場
起點： 烏蛟騰
終點： 烏蛟騰
行程： 6 小時
里數： 14 公里
難度： 2 星級，全程樹蔭。
日期： 2008-10-26
時間： 9:00 am
領隊： 韋信
團員： 100FUN 行山隊
地圖： 地圖連結 | 地圖連結 [橫切面地圖]
參考圖片： 圖片連結 | 圖片連結 | 圖片連結
地道美食：福利茶室

路線圖:

團長後記：

首先要多謝咁多位行山隊友參加上個星期日既 Fun Hiking.

上 個星期日, 我地五架車分別於唔同既區份開車往烏蛟騰, 好唔好彩, 竟然行到大尾篤遇到阿Sir 封路, 被迫要留係大尾篤商議一倫至由鹿頸嗰邊入去烏蛟騰, 係到我要多謝 Boris 提早入到去大尾篤及給我事先打咗底, 亦勞煩咗韋信同阿富仔先走去鹿頸嗰邊了解解封情況.

呢次既經歷, 題醒咗小弟, 以後去郊區之前, 一定要提早上運輸處網頁, 睇睇行山當日, 去起步點的交通路線有冇特別改動.

因 為先前既封路問題, 大隊原本由 9:00am 出發, 變成到10:00am 出發, 而路線由原本既烏蛟騰至荔枝窩大迴環, 變成烏蛟騰至三椏村小迴環, 雖然如此, 呢個改動亦冇令大家興致大減, 當大家影咗 group photo 後, 正式開始行山時, 各隊友都非常之興奮.

由烏蛟騰開始行時, 我地一行21個人隊型非常之整齊, 但過了九担租廢村之後, 因各人步速不同, 我地漸漸亦變咗分成三 team 人, 前中後咁行, 富仔一如以往, 唔係行山係飄山咁, 當然行係最頭啦! 而行山前一晚冇瞓過既 jv 亦因精力過盛, 同富仔並肩而飄, lhk, sai-lo, 鵪鶉仔等等都係先頭部隊之一, 最意想不到, 最令人驚喜既, 就係人人話佢係鳥不起既超級無敵小鋼炮Martin, 你咪睇佢件頭唔細, 原來呢條粉腸一d 都唔弱, 開頭行中後, 轉個身, 竟然成為先頭步隊之一, 同埋富仔佢地於11:20am 咗右到達三椏村.

而Jacky, Bono, 過路人, 藥皇, Eva, Boris, Michael, Ruby, 初哥, 初哥既friend, 韋信, 及小弟等, 都不約而同於11:35am及11:50am 左右到達三椏村, 因阿 victor 真係比較靜咗少少, 所以小弟都冇乜印象你係咩時間到三椏村.

有一樣嘢我一定要講, 我地行山隊當中, 有兩個一定係 4GL, 一個係 Alexchrome, 而別一個係 askaseed, 因為佢兩個, 全程都揸住部單鏡名機, 行吓影吓, 落後咗, 好快又追返上前, 飄來飄去, 飄上飄落, 我好懷疑夠竟佢地係咪同富仔同出一處?

好了! 當21人都到咗三椏村後, 又到開餐時間了, 韋信事先係村內既小店訂了兩圍客家菜, 斯文細食既坐埋一圍, 而另一圍就緊係蝗蟲之桌啦! 阿 askaseed 都未對好焦影相, 幾碟餸巳經插咗香咁濟, 邊過有份, 我唔係到 , 總之唔止一個人.

係處要特別多謝阿Michael 哥為大隊泡製既極品普洱茶, 同埋你既靚 cigar!

又多謝阿 Boris 嫂, Eva 幫大隊收 埋單.

到 了大約1:30pm 左右, 我地一行21人, 就開始走別一條路經犁石頭行返去烏蛟騰, 點齊人後開始行冇幾耐, 我地既隊型好快亦分為前中後3批人咁行, 因為呢條路一開始無耐就要上斜, 所以有一兩位隊友會感到有d 吃力, 由其係剛食完飯之後行, d 血去晒條腸道, 供上其他身體部位既氧份自然會少咗, 引至可能唔係咁夠氣力, 所以要慢慢行至得.

以我所知, 行最前既隊友, 只用咗一粒鐘鬆d 就飄咗返去烏蛟騰終點, 行中間既隊友亦於兩粒鐘內返到終點, 在此小弟要多謝各位對小弟及最後一批到達終點既隊友既包容及耐性, 要你地等咗成個幾鐘唔好意思.

因為當中有隊友上斜感到些少吃力, 為安全之見, 小弟同埋幾位隊友一同陪伴嗰d 隊友一齊慢慢行返出黎烏蛟騰終點, 小弟要確保咁多人行咗入去, 就一定要有齊咁多人行返出黎, 一個都不能少, 個個都要平平安安.

係呢處我要讚一讚, 初哥進步了唔少, 行多幾次你會更加掂架!

亦要係呢處多謝沿途有唔少隊友用 walkie talkie 或手提關心我地位置所在.

其實係行回程呢一段我個人覺得係最 enjoy 既, 因為慢慢行, 我可以有好多時間享受吓d 涼風, 及欣賞一吓四週既風景, 整個人好似回歸大自然咁, 我當時其實好想同阿Michael 講, 不如我地整返普洱慢慢嘆呢?

到咗四點, 我地最後呢批人終於同大隊會合, 怱怱咁飲枝氣水, 咁就抱着依依不捨既心情, 行去停車場取車打道回府, 各自返屋企.

最後係到特別鳴謝初哥, Boris, 96, 及韋信開車, 管接管送各隊友, 以及非常之多謝韋信對行山路線既安排.

大家我地係11月9日龍蝦灣郊遊徑燒烤之旅再見!

十月號 – 第一炮: 10月12日 (星期日)

各位行山隊隊友及有興趣參加行山團既朋友:

今個星期日, 亦即10月12日既行山路程巳確定為釣魚翁郊遊徑.

請於今個星期五下午5點正前, 在下面的人名名單, 或經 PM / email, confirm小弟是否參加.

行山路線： 釣魚翁郊遊徑

行山日期： 10月12日 (即今個星期日)
集合時間： 上午八點半
集合地點: 鑽石山地鐵巴士總站內的KMB 91號巴士站頭

前 往 方 法 ： 於鑽石山地鐵的巴士總站, 乘搭KMB 91號巴士於五塊田站下車
Link – http://www.kmb.hk/chinese.php?page=search&prog=route_stops.php&route_no=91&bound=2&select_from=&select_to=

起點: 清水灣二灘

終點: 五塊田

全程時間: 約3小時 (不計乘車所需時間在內)

當行畢全程後, 大家可商議到布袋澳或入西貢市共進午餐!

團長後記：

今朝, 揸車既紅葉, 初哥, 及所有行山隊友, 個個都有早冇遲咁相繼係 9:15am 前到達集合地點, 使到我地能夠準時開始 Fun Hiking 十月號第一炮 – 釣魚翁郊遊徑既行程.

我地一行人, 先行了一段斜路, 過冇幾耐, 大家終於到達咗釣魚翁郊遊徑既起點.

開頭上咗幾十級石級, 小弟還以為之後都只係一 d 上斜落斜既山路, 誰不知行了一陣間, 竟然又見到一段頗長又斜既石級路, 幾多百級我就冇數, 但呢段石級路, 係會行到某些人扯吓蝦, 或需半路停吓, 好讓對腳仔冇咁酸軟.

由 於, 此段石級路頗窄, 每一級石級又細, 加上其斜度, 及當時吹着清勁既涼風, 對於大部份既對友, 可以叫做一個很好既 warm-up, 但對於某幾位隊友來講, 可以叫做有 d 難度, 當中有一位新加入既隊友, 因佢有過去幾年甚少運動, 及剛係今朝食咗個頗飽既早餐, 佢行呢段石級路時頗為氣力, 幸好佢安全完成呢段石級路.

有一點我要強調, 行得比較慢一 d 既隊友, 你地千萬唔好擔心要其他隊友等你地, 亦唔好覺得唔好意思, 我地 Fun Hiking 唔需要同時間競賽, 大家出來一齊行山, 最緊要大家安全及 所有人 have fun!

在此我亦要多謝所有行山隊員沿途互相扶持. Thanks a lot!

上完嗰段石級之後, 大家都比優美既山海景吸引著, 再加上涼浸浸既風, 爽極!

之後大家一路行一路吹水唔沬嘴, 亦一路欣賞風景, 係大約中午左右, 大家相繼到達終點.

除幾位隊友, 因有要事要先回市區外, 我地一行12人, 兵分兩車, 落去布袋澳享咗用一個頗豐富既海鮮午餐. 點豐富法? 相信大家巳睇過吓 d 相.

食到大約下午三點幾, 我地Fun Hiking 十月號第一炮 – 釣魚翁郊遊徑既行程, 亦就此終結.

在此小弟十分多謝各隊友參加今日既行山團, 多謝初哥及紅葉接載其他隊友, 多謝分享零食既隊友, 及多謝幫手沿途瞻前顧後既隊友!

希望係 [Fun Hiking – 十月號第二炮] 10月26日行山團的烏蛟騰至荔枝窩行程再次見到大家.

各位巳confirm 明天行山既朋友:

大家明天準時係集合地點見! 僅記自備足夠飲用水, 乾糧, 帽子, 雨衣/雨傘, 手提, 及急救物資等.

行山日期： 九月廿八日
集合時間： 早上十點半
行山路線： 荃錦坳至深井 Link – http://www.traveler.com.hk/route/route27.htm
全 程 時 間 ： 約４ 小 時
集合地點： 荃錦坳起點,『郊野公園』站

荃錦坳 — 集合地點

到荃錦坳之交通公具KMB 51 號, 係『郊野公園』站落車

團長後記：

今日由荃錦坳行到深井, 算係咁勒, 條路有上斜有落斜, 雖然唔算辛苦, 但由田夫仔到清快塘嗰段, 最終都行到滿頭大汗, 而由起點到終點深井, 沿途久唔久都有d 好涼快既清風吹過來, 爽到極!

係中段, 阿 Michael 哥親手炮製山水普”利”茶比大家解解喝, 用山水即即沖出來既茶味, 真係人間一絕! 多謝 Michael哥!

經 今次行山後, 相信大家都略知各人 level 去到邊, 原來當中有人都行過唔少麥徑, 亦有人參加過毅行者, 有d 手攞相機, 影完相後, 一陣風咁又飄返上大隊前面, 亦有人原來曾經在多年前巳係某地點留下芳名, 還有好勇敢既大哥, 見到青竹蛇都唔怕, 仲要用樹技去調教阿蛇大哥, 膽大包天, 勇氣可加, 佩服! 佩服!

所以, 下一次行山, 我相信我地可以選擇一個長少少既行程, 但我諗要早返些少出發.

各位朋友, 有時間就提d 行程建議出來, 等大家研究吓啦!

大棠自然教育徑由大棠路旁的燒烤地點為起點，以大棠苗圃為終點。全長四公里， 步程約需兩小時。此徑全程都是林地，景色怡人。途中更設有清晰說明牌。附近亦有大棠樹木研習徑。

集合地點： 不適用
起點： 大棠路燒烤場
終點： 大棠路燒烤場
行程： 3 小時
里數： 4 公里
難度： 1 星級
時間： 11:00 am
領隊： 韋信
團員： 韋信、龍、琪琪、Beball
參考圖片： 圖片連結

« ‹ of 2 › »

遊梧桐寨幽谷，細賞「磨天石」下井底、馬尾二瀑，在全香港最長的馬尿寨主瀑前觀瀑聽泉，遙指魔鬼石塌坡，談奇述異說傳聞。回程遊道教聖境萬德苑後返林錦公路。

起點： 梧桐寨村
終點： 梧桐寨村
行程： 3 小時
里數： 6 公里
難度： 2.5 星級
時間： 10:00 am
領隊： 韋信
團員： 韋信
地圖： 地圖連結

布袋澳村位於西貢的清水灣，此村眾山圍繞，綠草青山，碧海粼粼，因村的環境狀如布袋，所以叫布袋澳。村的歷史己超過百多年，根據洪聖爺廟的錍銘，村民的姓 氏各有不同，不過為何村民會姓布己沒有人知道了，此村曾於清朝年間，十分興旺。 村民多以繁殖漁業為生，其村更以海鮮特產而聞名，村來有許多魚排，洋溢著漁港風味。村內仍保留其獨特的傳統文化，每逢洪聖誕，村民必有還神及慶祝的活動， 從這些傳統文化特色，我們深深的體會到一個海村，在經歷百多年的轉變，雖然生活環境己經現代化，但是仍然堅持保傳統的漁村文化。

集合地點： 不適用
起點： 布袋澳
終點： 布袋澳
行程： 0 小時
里數： 0 公里
難度： 不適用
日期： 2006-06-10
時間： 6:00 pm
領隊： 韋信
團員： 韋信、皋、May、Vivian

此徑由大尾督郊野公園管理站起至新娘潭瀑布附近止。由於路程較長且頗為崎嶇，祇適合有經驗的遠足人士使用。小徑位於風景優美的八仙嶺下船灣淡水湖旁，那裡 除可欣賞到美麗的湖光山色外，更可居高臨下，俯視鄉村土地的利用和船灣淡水湖的浩大工程。在不同的季節裡，淡水湖上空可看到不同形態的雲體。該徑穿過植林 區及灌木叢，又越過數條溪澗，所以沿途有很多機會看到不同的動植物，例如:楓香、大沙葉、崗松、桐樹等等。此外可見到在受山火及山泥傾瀉破壞的地方所採取 的補救工作。小徑沿途還有很多有趣的地理特徵，包括陡崖組成的高地和礫岩層的走向等。途中還可見到荒棄的梯田和曾經一度盛產珍珠的海灣，讓人想像一下先輩 的生活情況。

起點： 大尾督
終點： 新娘潭
行程： 4 小時
里數： 3 公里
難度： 2 星級
時間： 10:00 am
領隊： 韋信
地圖： 地圖連結
團員： 韋信、Amy、敏、Gi Gi、Carina
參考圖片： 圖片連結