hiking100fun

這是我其中一條最喜愛的行山路段，但對上一次行已經是 2010 年，也說不清是什麼原因這六年來都沒選擇走這條山徑。既然是我最喜愛的山徑，必定包含幾個基本元素：易行、靚景、美食及方便泊車。

起點位於烏蛟騰村，村口有約三十個車位。由烏蛟騰作起點的行山徑有很多選擇，所以假日遊人很多，車位於周六、日一早便爆滿。由烏蛟騰到三椏村起碼有三條路線，上路是經荔枝窩的荔谷古道，中路是犁三古道，下路是經上下苗田的苗三古道。我習慣走的是犁三古道往三椏村，再由苗三古道返回烏蛟騰。全程約十公里，三椏村剛好是路段的一半（即五公里）。

首段由八十米上一百五十米，位於高位可以遠眺印洲塘海。首一公里會經過九擔租村，十年前九擔租是廢村，但近年有人翻新了地方，還開了蜂場。經過犁頭石廢村後，不久便抵達三椏村。三椏村的福利茶室是一帶較好的客家菜餐廳，十多年來每逢經過三椏村都會幫襯福利茶室，只是從前三椏/荔枝窩出名走地雞粥，但自從政府立例禁止村民養雞後，那裡便再沒有地道的走地雞了，只有外來的貨色，再叫雞其實意義不大，這次也沒有特別點客家菜，只是隨意地叫了蠔餅及蝦。

貫徹 hea 行的風格，在福利茶室逗留了一段頗長時間才起行。回程走沿海的苗三古道，可以近距離欣賞印洲塘海。經過三椏涌後，路段都是林蔭小路，斷斷續續地上一百米後，最後返回九擔租及烏蛟騰。

集合地點： 烏蛟騰村
起點： 烏蛟騰村
終點： 烏蛟騰村
行程： 4 小時
里數： 10 公里
難度： 2.5 星級，路段崎嶇
日期： 2016-03-05
時間： 9:00 am
領隊： 韋信
團員： 韋信、Joan
地圖： 地圖連結
地道美食：福利茶室

« ‹ of 2 › »

Taken by Leica M9P with Summicron 35/2

由烏蛟騰出發，經九擔租、上苗田、下苗田、三椏涌、三椏村，經犁頭石再回到烏蛟騰。沿途經過多個廢村，飽覽印洲塘景色，並在荔枝窩或三椏村品嚐地道客家走地雞及芋頭扣肉。

集合地點： 九龍塘
起點： 烏蛟騰
終點： 烏蛟騰
行程： 4 小時
里數： 10 公里
難度： 2 星級
日期： 2010-01-09
時間： 9:00 am
領隊： 韋信
團員： 韋信、Yan、Joyce
地圖： 地圖連結 | 地圖連結 [橫切面圖]
地道美食：福利茶室

Photo taken by Contax IIa / Zeiss Biogon 35/2.8.  The full sized images are available to download here.

新界東北村落，沿海為印洲塘，水平如鏡，有境內西湖之稱。烏蛟騰及鹿頸有車路直達，故有很多村民居住。九擔租村屋尚完好，但己人去留空。上、下苗田，犁頭石，鎖羅盆，榕樹凹已經荒廢。從烏蛟騰出發, 沿媽田古道, 荔谷古道, 往荔枝窩, 落三椏村, 經苗三古道, 返回烏蛟騰。

集合地點：烏蛟騰
起點：烏蛟騰
終點：烏蛟騰
行程：5 小時
里數：12 公里
難度：2 星級
時間： 9:00 am
地道美食：福利茶室

Photo courtesy : Terence

« ‹ of 4 › »

領隊後記：團長強勢回歸之旅 — 東北小環走

屈指一算，早在兩個月前已經計劃了這次旅程，原因是團長功課繁忙，由八月計起，他最早的空檔也要安排到十月十八日，我們便索性把這次行程稱之為『團長強勢回歸之旅』。踫巧這天團長大壽，為隆重其事，路線亦挑選了團友最津津樂道的烏蛟騰至荔枝窩路線，津津樂道者，是三椏村的走地雞、梅子排骨、竽頭扣肉等地道客家農村菜。約在出發前一星期左右，先向三椏村福利茶室訂菜。起初，老闆電郵過來的菜單跟上年的一模一樣，但價格由上年的五百二十元一席上漲至六百八十元一席，再換上幾款海鮮，最後落實的菜單要八百三十元一席，加上酒水，大概要一百元一位。心想，菜單上傳給團友過目後，必定又被批評『Fu Far』了。

我一直對這條路線的踴躍程度抱有信心，截止時有十九人報名，我唯一擔心的是出發前一星期染上了小感冒。我當時告訴團長，該團能否成行，還要看康復的進度，為免大家掃興，還是強撐著身體出發。出發日早上九時左右，，團友們先後到達烏蛟騰停車場，唯獨華夫一車人未見蹤影。團長打電話問華夫位置，當事人謂『吐露港公路』，由吐露港出大埔，經工業村、汀角路、大尾篤、新娘潭路，起碼要二十分鐘車程。這時候，有口痕友說：『華夫嗎？五分鐘可以了。』華夫大約於九時三十分搖搖擺擺地駛進停車場，一行十九人，正式開始東北小環走之旅。

由烏蛟騰向北出發，首一公里為向上二百五十米的梯級路段。這時，大隊分成前中後三小隊，前隊由 Terence 等年青力壯團友先行，中隊由藥皇、高達、Ka Bik等，後隊是小弟、Boris 及 Yan。途中發生了一段小插曲，因為 Kinson 女友明艶照人，不斷惹來狂『蜂』浪蝶，迫不得已未等及後隊便要繼續路程。

前段經亞媽芴及分水凹，沿途略見幾十年前的人工遺蹟，例如築路時的路誌，隱藏著許多舊香港的歷史。其中一段通往梅子林的路段，路誌寫上是當年為通往『中和墟』而建造的，中和墟就是今天的沙頭角，若不是要趕上大隊，這些路誌也足夠讓我嘴饞上半天。另外，在分水凹處看見一個往蛤塘的路牌，我便向團友講述一個小聊齋故事：話說去年 Discuss HK 那邊有人分享自己的行山經歷，謂快將天黑時路經蛤塘，得到熱心女村民指路返回烏蛟騰，但問題是蛤塘村既無水、亦無電，已於廿多年前成了廢村，何來『女村民』指路？相關留言在：

http://www27.discuss.com.hk/viewthread.php?tid=8221907&extra=page%3D1&page=1 ﹝ 另在第三頁亦有網友指出該村已廢多時。﹞

成為一時佳話。

於中午時分，團友先後抵達荔枝窩，在廣場榕樹下小休。因為小休地方面前有一座刻上『慶春約』的建築物，這時有團友問起『慶春約』的意思，慶春約是荔枝窩附近幾條村落，但幾多條則不大幾得起，更遑論要逐一指出它們的名字。為免有損星級領隊的威信，唯有『扮識』般含糊地說東北三條村：荔枝窩、三椏村及鎖腦盆。村民聽罷，立刻糾正說是東北七村﹝其實是八村﹞：荔枝窩、三椏、鎖腦盆、梅子林、蛤塘、牛屎湖 ….. 但連村民自己也說不出第七條村的名字。

在荔枝窩拍過團照後，便往三椏村進發，抵達三椏村時約下午一時，行程仍算 on schedule。先上的海蝦每隻都像姆指般大小，團友都感到譁然，其他小菜都屬水準之上，唯獨清蒸海立未熟，再蒸已經失了火喉，侍應還把我的抹汗巾收了去當枱布，算是美中不足之處。另一件掃興事，是小弟把錢包留了在車上，令團長壽辰當日竟然要替我這位失暈領隊墊資午飯，實為醜事一樁。

午飯過後，繼續行程後半段，由下路苗三古道，經過上苗田、下苗田廢村及九擔租返回烏蛟騰，因為上下苗田村莊太廢，沒什麼參觀價值，所以沒有花太多時間留連。後段，小弟因為感冒未清，氣束感覺愈來愈強烈，半行半走地捱到烏蚊騰出口。感謝團長及 Boris 一路照料，然而如此過失，以後也不敢再犯了。

由烏蛟騰出發，經九擔租、上苗田、下苗田、三椏涌、三椏村，經犁頭石再回到烏蛟騰。沿途經過多個廢村，飽覽印洲塘景色，並在荔枝窩或三椏村品嚐地道客家走地雞及芋頭扣肉。

集合地點： 烏蛟騰停車場
起點： 烏蛟騰
終點： 烏蛟騰
行程： 6 小時
里數： 14 公里
難度： 2 星級，全程樹蔭。
日期： 2008-10-26
時間： 9:00 am
領隊： 韋信
團員： 100FUN 行山隊
地圖： 地圖連結 | 地圖連結 [橫切面地圖]
參考圖片： 圖片連結 | 圖片連結 | 圖片連結
地道美食：福利茶室

路線圖:

團長後記：

首先要多謝咁多位行山隊友參加上個星期日既 Fun Hiking.

上 個星期日, 我地五架車分別於唔同既區份開車往烏蛟騰, 好唔好彩, 竟然行到大尾篤遇到阿Sir 封路, 被迫要留係大尾篤商議一倫至由鹿頸嗰邊入去烏蛟騰, 係到我要多謝 Boris 提早入到去大尾篤及給我事先打咗底, 亦勞煩咗韋信同阿富仔先走去鹿頸嗰邊了解解封情況.

呢次既經歷, 題醒咗小弟, 以後去郊區之前, 一定要提早上運輸處網頁, 睇睇行山當日, 去起步點的交通路線有冇特別改動.

因 為先前既封路問題, 大隊原本由 9:00am 出發, 變成到10:00am 出發, 而路線由原本既烏蛟騰至荔枝窩大迴環, 變成烏蛟騰至三椏村小迴環, 雖然如此, 呢個改動亦冇令大家興致大減, 當大家影咗 group photo 後, 正式開始行山時, 各隊友都非常之興奮.

由烏蛟騰開始行時, 我地一行21個人隊型非常之整齊, 但過了九担租廢村之後, 因各人步速不同, 我地漸漸亦變咗分成三 team 人, 前中後咁行, 富仔一如以往, 唔係行山係飄山咁, 當然行係最頭啦! 而行山前一晚冇瞓過既 jv 亦因精力過盛, 同富仔並肩而飄, lhk, sai-lo, 鵪鶉仔等等都係先頭部隊之一, 最意想不到, 最令人驚喜既, 就係人人話佢係鳥不起既超級無敵小鋼炮Martin, 你咪睇佢件頭唔細, 原來呢條粉腸一d 都唔弱, 開頭行中後, 轉個身, 竟然成為先頭步隊之一, 同埋富仔佢地於11:20am 咗右到達三椏村.

而Jacky, Bono, 過路人, 藥皇, Eva, Boris, Michael, Ruby, 初哥, 初哥既friend, 韋信, 及小弟等, 都不約而同於11:35am及11:50am 左右到達三椏村, 因阿 victor 真係比較靜咗少少, 所以小弟都冇乜印象你係咩時間到三椏村.

有一樣嘢我一定要講, 我地行山隊當中, 有兩個一定係 4GL, 一個係 Alexchrome, 而別一個係 askaseed, 因為佢兩個, 全程都揸住部單鏡名機, 行吓影吓, 落後咗, 好快又追返上前, 飄來飄去, 飄上飄落, 我好懷疑夠竟佢地係咪同富仔同出一處?

好了! 當21人都到咗三椏村後, 又到開餐時間了, 韋信事先係村內既小店訂了兩圍客家菜, 斯文細食既坐埋一圍, 而另一圍就緊係蝗蟲之桌啦! 阿 askaseed 都未對好焦影相, 幾碟餸巳經插咗香咁濟, 邊過有份, 我唔係到 , 總之唔止一個人.

係處要特別多謝阿Michael 哥為大隊泡製既極品普洱茶, 同埋你既靚 cigar!

又多謝阿 Boris 嫂, Eva 幫大隊收 埋單.

到 了大約1:30pm 左右, 我地一行21人, 就開始走別一條路經犁石頭行返去烏蛟騰, 點齊人後開始行冇幾耐, 我地既隊型好快亦分為前中後3批人咁行, 因為呢條路一開始無耐就要上斜, 所以有一兩位隊友會感到有d 吃力, 由其係剛食完飯之後行, d 血去晒條腸道, 供上其他身體部位既氧份自然會少咗, 引至可能唔係咁夠氣力, 所以要慢慢行至得.

以我所知, 行最前既隊友, 只用咗一粒鐘鬆d 就飄咗返去烏蛟騰終點, 行中間既隊友亦於兩粒鐘內返到終點, 在此小弟要多謝各位對小弟及最後一批到達終點既隊友既包容及耐性, 要你地等咗成個幾鐘唔好意思.

因為當中有隊友上斜感到些少吃力, 為安全之見, 小弟同埋幾位隊友一同陪伴嗰d 隊友一齊慢慢行返出黎烏蛟騰終點, 小弟要確保咁多人行咗入去, 就一定要有齊咁多人行返出黎, 一個都不能少, 個個都要平平安安.

係呢處我要讚一讚, 初哥進步了唔少, 行多幾次你會更加掂架!

亦要係呢處多謝沿途有唔少隊友用 walkie talkie 或手提關心我地位置所在.

其實係行回程呢一段我個人覺得係最 enjoy 既, 因為慢慢行, 我可以有好多時間享受吓d 涼風, 及欣賞一吓四週既風景, 整個人好似回歸大自然咁, 我當時其實好想同阿Michael 講, 不如我地整返普洱慢慢嘆呢?

到咗四點, 我地最後呢批人終於同大隊會合, 怱怱咁飲枝氣水, 咁就抱着依依不捨既心情, 行去停車場取車打道回府, 各自返屋企.

最後係到特別鳴謝初哥, Boris, 96, 及韋信開車, 管接管送各隊友, 以及非常之多謝韋信對行山路線既安排.

大家我地係11月9日龍蝦灣郊遊徑燒烤之旅再見!

新界東北村落，沿海為印洲塘，水平如鏡，有境內西湖之稱。烏蛟騰及鹿頸有車路直達，故有很多村民居住。九擔租村屋尚完好，但己人去留空。上、下苗田，犁頭石，鎖羅盆，榕樹凹已經荒廢。

集合地點： 上水廣場
起點： 烏蛟騰
終點： 烏蛟騰
行程： 4 小時
里數： 10 公里
難度： 2 星級
時間： 1:00 pm
領隊： 韋信
團員： 韋信、琪琪、龍、BoBo
地道美食： 福利茶室