| « 大帽山日出行動 | 鹿頸尤德亭、嘉龍潭 » |
南丫島環島遊
來緊2009年, Hiking100fun 第一個行山團會係1月11日, 亦即下個星期日舉行, 今次會去行南丫島, 由索罟灣起步繞行菱角山一週，返回索罟灣後再向榕樹灣進發, 而索罟灣至榕樹灣之路線是遊人來往榕樹灣及索罟灣的必經之路，沿途除可欣賞洪聖爺海灘的海岸生態，更有機會於索罟灣泥灘找到招潮蟹、彈塗魚和小白鷺等生態小動物。其次，你還能在短短的路程上參觀榕樹灣天后廟及索罟灣天后廟，在索罟灣海邊一帶更會見到據說在二次大戰時日軍把多艘快艇匿藏作戰的神風洞, 當到達榕樹灣後, 便於當地的酒家共進海鮮午餐。
有興趣參加當日行山既隊友或朋友, 請儘快或於下個星期四的下午5點正前報名, 領隊韋信遲些會出連結比大家報名。
行山路線：索罟灣至榕樹灣
行山日期：1月11日 (即下個星期日)
集合時間：上午8點10分
集合地點：中環碼頭 (係往索罟灣的碼頭外等侯)
起點：索罟灣
終點：榕樹灣
行山時間：約4小時內
地道美食：建興阿婆豆腐花、民豐海鮮酒家
如有任何人怕行石級或太辛苦, 可乘 10:20am 往索罟灣, 於11:00am 跟大隊會合去榕樹灣, 但一定要預早告知大隊.
路線圖:
Photo by Michael:
團長後記：
尋日早上7點幾出門口, 雖然係10度左右, 但小弟都唔覺得太凍, 因為尋日係 Hiking100Fun 於2009年舉行行山團既第一炮, 所以小弟個心高興如火! 
小 弟係 7點40分巳到咗 去南丫島索罟灣既4號碼頭, 之後便同方中信及Michael 去麥記食咗個早餐, 係8:15am 返到碼頭時巳見到正係到食緊糯米雞既 lhk 同埋佢既女同事, 而則邊就有幾乎瞓過龍既初哥及最早到既車厘子小姐, 冇幾耐之後 Bono, Yan Yan, Yan So, Gundam, Gundam So, 同埋方中信既 friend 都係 8:25am 前到達碼頭.
但係此時我地仲未見到妄煮, 於是乎 call 佢, 不過, 竟然係冇人聽! 
心知妄煮更係仲係張床上發緊綺夢唱緊波兒 … 波兒 … 波兒 … … 
算啦! 我地一行13人上船啦! 本應 Ruby 都會黎但Michael 話佢唔係太舒服, 所以佢亦臨時甩底! 希望 Ruby 快 d 好番啦! 
話說係由中環去索罟灣既船程中, 小弟同方中信同佢既 friend 傾緊相機時, 突然前排既大嬸插嘴讚美方中信手上既古董相機, 夠竟呢位大嬸係欣賞方中信手上既古董Contax 相機, 定係欣賞風度翩翩文質彬彬既方中信呢? 
係 約 9:10am, 大隊便到達索罟灣, 等幾位隊友放等幾兩後, 我哋便影團照, 呢個咁神性既任務, 更係又由至識嘆世界既雪茄王 Michael 大大負責啦! 只要 Michael 一攞出佢既毒門暗器 “八爪魚” 及 D700, 大家便自動自覺排好位等影相, 多謝 Michael 哥! 
影 兩張相後, 大隊便開始上路, 過咗一列酒家, 小賣店, 及天后廟就踏上索罟灣家樂徑, 行咗一陣就要上石級同上斜, lhk, 女同事, Yan Yan, Yan So, Bono 等更係行係最前嗰批啦! 而後邊嗰批唔使講都知係邊幾位啦! 因為我哋係機佬要影吓相嘛! 
係約10點半前, 所有隊友都上到菱角山上既涼亭, 四周風和日麗, 當中有隊友竟然離隊, 原來係阿 Yan同 lhk表現體力既時間, 佢地兩個跑上對面山頭, 此時我亦再一次打比妄煮, 佢終於以半夢半醒既聲音接聽我既電話, [團長, 唔好意思呀!] 咁我就明白尋日冇人請食飯了! 
於是乎我用 Walkie Talkie call 返兩位猛男歸隊, 向石排灣進發, 在向下行之際, 得悉原來女同事係小弟既校友, 呢個世界真係細! 
到石排灣後向榕樹下行之際, 竟然發生了少少意外, 要出動小弟同各隊友行山以來都未用過既急救包! 
點解要出動到急救包? 原來有位女隊友露底, 唔係, 係甩底, 係甩鞋底至啱!
當小弟得悉此事後, 小弟於是乎取出急夠包內既白膠布, 幫該位女隊友隻鞋做咗個小急救, 再加上 Gundam 咁啱有條索繩, 於是乎呢個甩鞋底危機可以即時化解, 之後便再向模達村進發.
到咗模達村後, 小弟買咗些楊桃同隊友分享, 雖然浸桃皮 d 味又 d 苦苦地, 但桃肉味鮮多汁, 非常解渴, 怕酸既車厘子小姐見初哥食到咁滋味, 終於都比面試返個.
食完楊桃後, 就係玩毒人遊戲時間, 方中信竟然叫 Gundam 攞支 100 Marco 出黎毒我, 呢次真係多得你地兩位唔少呀! 
比人毒完後, 再行前少少, 又竟然見到有村民用柴爐燒飯! 正呀! 隔離阿婆 d 飯, 真係香 d 架! 
同 村民傾幾句後, 大隊又再上山, 途經在山上望見模達灣水清見底, 正係好機會比小弟 practice 吓 用CPL既機會, 之後大家都覺得有 d 肚餓, 行多半個鐘, 約12:45左右, 大隊便回到索罟灣, 眾人便係該處食 d 小食如花生, 魚旦, 雞屎滕茶果等充機, d 雞屎滕茶果真係好正架! 
大家掃完一輪街後, 便行去榕樹灣.
由索罟灣行去榕樹灣, 竟然又要上山落山, 妄煮甩底對我地黎講係壞事, 但對佢黎講可能係好事! 
當上到最後一個高點, 嗰處又有一個涼亭, 小弟到步後, 又聽到又需要出動急救包既求救信訊號.
原來該位女隊友, 另一隻鞋大叫肚餓呀! 個口可以開到好似暴龍咁大! 
好 在當中有隊友立制攞條粗丈根出黎, 沽住小鞋仔把口, 當係涼亭後影完團照, 我地便向阿婆豆腐花店前進, 而好幾位隊友如方中信既 friend, lhk, yan yan, yan so, 及女同事等, 亦先行幾廿步, 包上風車山, 睇一睇架風車, 而其餘隊友就先去食阿婆豆腐花, 在等侯上風車山既隊友歸隊前, 小弟同 Michael 便係附近既農地同個阿伯吹吓水, 阿伯非常之好人, 教我地點樣簡菜同煮菜, 回到豆腐花店時, 見到先前同佢玩過既貓仔, 如嘆咁坐咗上車厘子小姐既玉腿上, 好 cute 呀! 
無幾耐 lhk, yan yan 等便歸隊, 趁佢地等食豆腐花時, 我地便 hea 吓 hea 吓咁行去榕樹灣, 無幾耐, 所有人又歸隊, 入到榕樹灣, 當中又有隊友忍唔住, 要食返串串燒, 方中信亦請咗小弟食咗一串牛肉串燒, 好正呀! 多謝信信! 
之後大隊便係一間味到 ok, 但貴夾唔抵既 fu fa late lunch, 各位真係唔好意思呀! 
食完 late lunch 後, 我地便坐 5pm 船返去中環, 係船程中, Michael 又攞佢既 headphone 出黎毒小弟.
到 5:25pm 左右, 船巳抵達中環碼頭, 各人係碼頭外, 吹咗幾分鐘水, 便抱着一個行咗10公里又上山又落山頗疲倦既身驅各自回家.
多謝咁多位行山隊友參加尋日呢個咁開心既行山活動!
多謝方中信同佢既 friend 協助帶路, 多謝 Michael 幫手影團照, 多謝 Bono 幫手買豆腐花, 多謝 Gundam 幫我影咗唔少相, 同埋要多謝所有機佬毒害小弟!
Report Pencil!
又話最遲星期五晚報名，點解close左架？？？？！！！
我同慳娜都黎呀靚仔信！！！！！
hannah ~